Vashat e Kombëtares së Kosovës kanë filluar sot përgatitjet për dy ndeshjet e fundit të ciklit kualifikues për Euro 2025.

Dardanet në katër ndeshjet e deritashme të Grupit 4 në Ligën B nuk kanë arritur të marrin pikë, derisa për kundërshtarë do të kenë dy skuadrat favorite të grupit, Ukrainën dhe Uellsin.

Ndeshjen e parë, të përzgjedhurat e Anneli Andersen, e zhvillojnë të premten, në stadiumin “Fadil Vokrri”, në orën 18:00, derisa më pas katër ditësh do të luajnë kundër Uellsit si mysafire.

Përkundër temperaturave të larta, Dardanet në stërvitjen e parë të zhvilluar në Kampin Nacional të FFK-së në Hajvali kanë treguar përkushtim të lartë dhe dëshirë të madhe për t’u përgatitur për paraqitje sa më dinjitoze.

Futbollistja dardane, Rrezona Ramadani pas stërvitjes tha se atmosfera tek kombëtarja është e mirë dhe shpresojnë të arrijnë rezultate pozitive.

“Sot ishte stërvitja e parë, ekipi është i kompletuar, atmosfera është shumë e mirë. Kemi edhe dy ditë kohë për t’u përgatitur për ndeshjen kundër Ukrainës dhe për t’i analizuar gabimet e ndeshjeve të kaluara. Shpresoj se do të kemi mundësi t’i arrijmë pikët e para në grup dhe të bëjmë një ndeshje sa më pozitive e më pas të mendojmë edhe për ndeshjen kundër Uellsit. Shpresoj të arrijmë rezultat pozitiv”, tha Ramadani.

Në rezultate pozitive shpreson edhe Edona Kryeziu ku potencoi se kanë mësuar nga gabimet e dy ndeshjeve të para dhe do të mundohet t’i evitojnë ato.

“Stërvitja sot shkoi shumë mirë, grupi është i kompletuar dhe ka filluar të komponohet shumë mirë. Janë dy ndeshje shumë të rëndësishme për neve. Shpresoj të kemi rezultate pozitive edhe pse janë ndeshje shumë të vështira, por besoj në grupin e lojtareve. Normalisht çdo ndeshje ndryshon nga tjetra dhe ne po përgatitemi maksimalisht. Dy ndeshjet e para me këta kundërshtarë i kemi humbur po tash do të punojmë sa më shumë që gabimet që i kemi bërë të mos i përsërisim në këto dy takime”, tha Kryeziu./Arbresh.info